Jos 16 | NdeIBE | STEP | Isabelo sikaJosefa saqala eJodani leJerikho, empumalanga yamanzi eJerikho, sakhwela sisuka lapho sisiya enkangala singena elizweni elilamaqaqa eleBhetheli.

Joshua 16

Isabelo sika-Efrayimi loManase

1 Isabelo sikaJosefa saqala eJodani leJerikho, empumalanga yamanzi eJerikho, sakhwela sisuka lapho sisiya enkangala singena elizweni elilamaqaqa eleBhetheli. 2 Sadabula sisuka eBetheli (okutsho iLuzi) sachaphela esabelweni sama-Arikhithi e-Atharothi, 3 sehlela entshonalanga esabelweni seBhethi Horoni ephansi sisiya eGezeri, sisiyaphelela olwandle.

4 Ngakho uManase lo-Efrayimi, izizukulwane zikaJosefa, bemukela ilifa labo.

5 Leli kwakuyilizwe lika-Efrayimi usendo lunye ngalunye: Umngcele welifa labo wawusuka e-Atharothi Adari empumalanga usiya eBethi Horoni Ephezulu 6 waqhubeka usiya olwandle. Usuka eMikhimetha enyakatho wajika empumalanga usiya eThahanathi Shilo, usedlula eJanowa empumalanga. 7 Wasusehlela phansi usuka eJanowa usiya e-Atharothi leNayara, wathinta iJerikho wayaphutshela kuJodani. 8 Usuka eThaphuwa umngcele waya entshonalanga eDongeni lweKhana wayaphelela olwandle. Leli kwakuyilifa lesizwana sako-Efrayimi, usendo lunye ngalunye.

9 Wawugoqela njalo wonke amadolobho lemizana yawo eyayehlukaniselwe ama-Efrayimi phakathi kwelifa labako Manase.

10 Kabazange badudule amaKhenani ayehlala eGezeri; kuze kube lamhla amaKhenani ahlala phakathi kwabantu bako-Efrayimi kodwa besenziswa umsebenzi wobugqili.